ബൊഹീമിയന്‍ നോട്ട്സ്

രണ്ട് വർഷത്തെ കഷ്ടപ്പാടുകൾക്കും പരിശ്രമത്തിനും അവസാനമായിരിക്കുന്നു.കോവിഡ് കാലഘട്ടത്തിൽ ആയിരുന്നു ബി എഡ് കോഴ്സിന് ചേർന്നത്.ആറു മാസത്തോളം ഓൺലൈൻ ക്ലാസുകൾ ആയിരുന്നു എന്നാൽ കോവിഡ് മാറിയതോടെ എല്ലാം പഴയ പോലെ ആയി.സ്കൂളിൽ ഇന്റേൺഷിപ്പിന് പോയി, പിന്നെ റെക്കോർഡുകളുടെ വരവായിരുന്നു.ഇന്നത്തോടെ വർക്കുകൾ എല്ലാം സബ്മിറ്റ് ചെയ്തു.നാളെ കമ്മിഷൻ എത്തുന്നു.... 

അൻപത് ദിവസം നീണ്ടുനിന്ന കഷ്ടപ്പാടിനൊടുവിൽ പ്രൊജക്റ്റ്‌ അവസാനഘട്ടത്തിലേയ്ക്ക് ഇന്ന് എത്തിനിൽക്കുന്നു.പ്രിൻസിപ്പൽ ആയിരുന്നു ഗൈഡ്.അദ്ദേഹത്തിന്റെ അളവറ്റ സഹായവും മാർഗനിർദ്ദേശങ്ങളും പ്രൊജക്റ്റ്‌ പൂർത്തിയാക്കാൻ നൽകിയ പ്രോത്സാഹനവും ചെറുതല്ല. പോക്‌സോ പ്രതിരോധത്തിൽ ചൈൽഡ് ലൈൻ സേവനവും അധ്യാപക അവബോധവും തിരുവനന്തപുരം നഗരസഭയിലെ സ്കൂളുകളെ അധികരിച്ച് ഒരു പഠനം എന്നതായിരുന്നു പ്രൊജക്റ്റ്‌ വിഷയം. നിയമപാലകരുടെയും അധ്യാപകരുടെയും സഹായം പ്രൊജക്റ്റ്‌ പൂർത്തിയാക്കാൻ ഒരുപാട് സഹായകമായി. 

ഇന്റേൺഷിപ്പിന്റെ അവസാന ദിനമായിരുന്നു ഇന്ന്.30 ദിവസം നീണ്ടുനിന്ന സ്കൂൾ ദിനങ്ങൾ ഇന്ന് അവസാനിക്കുന്നു.ടീച്ചർമ്മാർക് എല്ലാം മധുരം നൽകി.ഹെഡ്മിസ്ട്രെസിന് സ്നേഹോപഹാരമായി ഒരു ചെടിച്ചട്ടി നൽകി.കുട്ടികളുമായി കുറെയേറെ ചിത്രങ്ങൾ എടുത്തു. ടീച്ചർ ഇനിയും വരണമെന്ന വാക്കുകളിലൂടെ കുട്ടികൾ യാത്രയാക്കി..... 

ജീവിതത്തിൽ ഏറ്റവും സന്തോഷമേറിയ ദിനങ്ങൾ ആയിരുന്നു ഈ കഴിഞ്ഞ 30 ദിവസങ്ങൾ.ടീച്ചർ എന്ന വിളി കേൾക്കുന്നതിനപ്പുറം ഹൃദയം കൊണ്ട് ചിലർ നമ്മെ ഓർക്കുന്നു എന്ന് തോന്നിച്ച ദിവസങ്ങൾ.ചിത്രങ്ങൾ എപ്പോഴും ഓർമ്മകൾ ആണ് നൽകുന്നത്.അവരോടൊപ്പം എടുത്ത ഓരോ ചിത്രങ്ങളും ഫോണിൽ അല്ല മനസ്സിൽ ആയിരുന്നു പതിപ്പിച്ചത്.

8ബി ക്ലാസ്സിലെ അവസാന ദിവസം ആയിരുന്നു ഇന്ന്.ക്ലാസ്സിൽ നിന്നും ഫീഡ്ബാക്ക് വാങ്ങി തിരിച്ച് ഇരിപ്പിടത്തിൽ വന്നപ്പോൾ 8ബിയിലെ രണ്ട് ആൺകുട്ടികൾ അടുത്തേക്ക് വന്നു.ഓട്ടോഗ്രാഫ് നൽകാമോ എന്ന് ചോദിച്ചു.പേപ്പർ ചോദിച്ചപ്പോൾ ടീച്ചർ ഞങ്ങളുടെ കൈയ്യിൽ എഴുതി തന്നാൽ മതിയെന്ന് പറഞ്ഞു.അവർ കൈയ്യിൽ ആണ് അത് വാങ്ങിയതെങ്കിലും ഞാൻ അവർക്ക് ഹൃദയത്തിൽ കുറിച്ച വാക്കുകൾ ആയിരുന്നു പകർന്നു നൽകിയത്....

പോക്‌സോയെയും ചൈൽഡ് ലൈൻ സേവങ്ങളെകുറിച്ചും അവബോധം നൽകുന്നതിനായി കുട്ടികൾക്ക് ഇന്ന് ഒരു പ്രബോധനാത്മക ക്ലാസ്സ്‌ എടുത്തു. പോക്‌സോ കേസുകൾ ശ്രദ്ധയിൽപ്പെട്ടാൽ എടുക്കേണ്ട നടപടികൾ, ചൈൽഡ് ലൈൻ നൽകുന്ന സേവനങ്ങൾ എന്നിവയെകുറിച്ചെല്ലാം കുട്ടികൾക്ക് വ്യക്തമായ ധാരണ നൽകി.  

ഞങ്ങളുടെ നേതൃത്വത്തിൽ ഗൊരേറ്റിയിലെ ആദ്യത്തെ സ്വാതന്ത്ര്യദിനാഘോഷപരിപാടി ആയിരുന്നു ഇന്നലെ കഴിഞ്ഞത്.രാവിലെ 7.30 തന്നെ ഞങ്ങൾ എല്ലാവരും സ്കൂളിൽ എത്തി. വിവിധ സംസ്ഥാനങ്ങളെ പ്രതിനിധീകരിച്ചു കൊണ്ടുള്ള വേഷങ്ങൾ അണിഞ്ഞ കുട്ടികൾ പരിപാടിയ്ക്ക് മാറ്റ് കൂട്ടി.കുട്ടികളുടെ പ്രസംഗങ്ങളും ദേശഭക്തി ഗാനങ്ങളും ഈ സ്വാതന്ത്ര്യദിനത്തെ കൂടുതൽ ഭംഗി ആക്കി.മാർ ഇവാനിയോസ് കോളേജിലെ കെമിസ്ട്രി വിഭാഗം മേധാവി പ്രൊഫ സുജു സാർ ആയിരുന്നു മുഖ്യഅതിഥി....

ആദി : ടീച്ചറിന് ഏറ്റവും ഇഷ്ടപെട്ടത് എന്താ?  ഞാൻ :മനസിലായില്ല  ആദി :ടീച്ചറിന് കമ്മൽ ഇഷ്ടമാണോ?  ഞാൻ :അതേല്ലോ  ആദി :ok ടീച്ചർ   ഇന്ന് ഇതാ വരുന്നു കൈയ്യിൽ ഒരു കൊച്ചു കവറുമായി ആദി.വെള്ള മുത്തുകൾ പതിപ്പിച്ച രണ്ട് ജിമിക്കികൾ.തന്ന സാധനത്തേക്കാളേറെ അതിൽ നിറയെ അവളുടെ സ്നേഹം ആയിരുന്നു.എന്നെ വാരി പൊതിഞ്ഞ സ്നേഹം....

ഇനിയുള്ള 9 ദിവസങ്ങൾ മാത്രമാണ് സെന്റ് ഗൊരേറ്റി സ്കൂളിൽ ഉള്ളത്.ഇന്ന് ഉച്ച ഭക്ഷണം വിളമ്പാൻ പോയിരുന്നു.ചോറും സാമ്പാറും പയർ തോരനും ആയിരുന്നു.കുട്ടികൾ കഴിച്ചു കഴിഞ്ഞ ശേഷം ബാക്കി ഉണ്ടായിരുന്ന കുറച്ച് ഭക്ഷണം അക്യു ന സിസ്റ്റർ മുൻകൈ എടുത്ത് ഞങ്ങൾക്ക് തന്നു. 

ഇന്നത്തെ ദിവസം കുറച്ചു തിരക്കേറിയതായിരുന്നു.രാവിലെ മുതൽ 3 പീരീഡ് തുടർച്ച ആയി ക്ലാസ്സ്‌ എടുക്കേണ്ടി വന്നു. അതിനു ശേഷമാണ് ക്ലാസ്സ്‌ ഇല്ലെങ്കിലും 8ഇ ക്ലാസ്സിലെ കുട്ടികളുടെ അടുത്ത്‌ കുറച്ച് നേരം ചെലവിട്ടു.അവരുടെ ടീച്ചർ വരുന്നത് വരെ അവിടെ ആയിരുന്നു.വിശേഷങ്ങൾ ചോദിച്ചും പറഞ്ഞും എനിക്ക് അവർ പാട്ടു പാടി തന്നും ഈ ദിവസം ഇങ്ങനെ അവസാനിക്കുന്നു.... 

നിർദ്ദേശിക്കപ്പെട്ടിട്ടുള്ള പീരീഡുകൾക്ക് ശേഷം 8 ഇ ക്ലാസ്സിൽ ഏഴാമത്തെ പീരീഡ് ക്ലാസ്സ്‌ എടുക്കാൻ കുട്ടികൾ വിളിച്ചു.എന്റെ ക്ലാസ്സ്‌ അല്ലെങ്കിൽ കൂടി 5 പേരു മാത്രം ഉണ്ടായിരുന്ന മലയാളം മീഡിയം ആയിരുന്ന ആ ക്ലാസ്സിനോട് വല്ലാത്ത ഒരു അടുപ്പം തോന്നി.സ്കൂളിന്റെ എല്ലാ ബഹളങ്ങളിൽ നിന്നും ഒതുങ്ങി തങ്ങളുടേതായ ലോകം കണ്ടെത്തുന്ന 5 പേരെ ആയിരുന്നു ഞാൻ അവിടെ കണ്ടത്.

കഴിഞ്ഞ ഒരാഴ്ച കുട്ടികൾക്ക് നടത്തിയ പരീക്ഷകളുടെ മാർക്ക്‌ നൽകിയ ശേഷം അവരുടെ നിലവാരത്തെ വിലയിരുത്തുന്നതിന് വേണ്ടി ഇന്ന് സ്കൂളിൽ ഉച്ചയ്ക്ക് ശേഷം പിറ്റിഎ മീറ്റിംഗ് ആയിരുന്നു.എല്ലാ കുട്ടികളുടെയും രക്ഷകർത്താക്കൾ സ്കൂളിൽ എത്തിയിരുന്നു.കൂടാതെ ഞങ്ങളുടെ ക്ലാസുകൾ കാണുന്നതിനും റെക്കോർഡ് വിലയിരുത്തുന്നതിനുമായി കോളേജ് പ്രിൻസിപ്പൽ ബെനെഡിക് സാർ ഇന്ന് എത്തിയിരുന്നു. 

യു പി വിഭാഗത്തിന് ഇന്നത്തെ ദിവസം സ്പോർട്സിനായി മാറ്റി വെച്ചിരിക്കുകയായിരുന്നു.ഞങ്ങളെ എല്ലാവരെയും സ്പോർട്സ് ഡ്യൂട്ടിക്ക് ആണ് നിയമിച്ചിരുന്നത്.ആദ്യത്തെ രണ്ട് സെക്ഷൻ കഴിഞ്ഞപ്പോഴേയ്ക്കും മഴ കാരണം പരിപാടികൾ മാറ്റി വയ്‌ക്കേണ്ടി വന്നു.അടുത്ത ദിവസം ബാക്കി ഇനങ്ങൾ നടത്താം എന്ന തീരുമാനം ഹെഡ്മിസ്ട്രസ് എടുത്തു.

ചാന്ദ്ര ദിനത്തോടനുബന്ധിച്ച് സ്കൂളിൽ പോസ്റ്റർ നിർമ്മാണ മത്സരം നടത്തിയിരുന്നു.കുട്ടികൾ നിർമ്മിച്ച പോസ്റ്ററുകൾ എല്ലാം എക്സിബിഷൻ എന്ന രീതിയിൽ പ്രദർശിപ്പിക്കുകയും ബാക്കിയുള്ള കുട്ടികൾക്ക് കാണാൻ കഴിയുന്ന തരത്തിൽ പ്രദർശനം ഒരുക്കുകയും ചെയ്തു.

മാറി വന്ന ടൈംടേബിൾ പ്രകാരം ഇന്ന് രാവിലെയുള്ള ഡ്യൂട്ടി എനിക്കായിരുന്നു.8.30 സ്കൂളിൽ എത്തി.മോർണിംഗ് ഡ്യൂട്ടിക്ക് ശേഷം പ്രാർഥന ആയിരുന്നു.ഒരാഴ്ച നീണ്ടു നിന്ന പരീക്ഷകൾ ഇന്ന് ആണ് അവസാനിക്കുന്നത്.താളം തെറ്റി കിടന്ന ക്ലാസുകൾ അടുത്ത ദിവസം മുതൽ പഴയ തരത്തിൽ ആകുമെന്ന് കരുതുന്നു..... 

ഒരു മാസം നീണ്ടു നിന്ന വായനാ മാസത്തിന്റെ അവസാനം ഇന്ന് ആയിരുന്നു.സ്കൂളിലെ പൂർവ്വ വിദ്യാർത്ഥിയും യുവ എഴുത്തുകാരിയും ആയ അഖില ആയിരുന്നു അതിഥി.കുട്ടികളുടെ മനോഹരങ്ങളായ പരിപാടികൾ ധാരാളം ഉണ്ടായിരുന്നു.ഈ ദിവസം ഇങ്ങനെ അവസാനിച്ചു.

രണ്ടാം ഘട്ട ഇന്റേൺഷിപ് ആരംഭിച്ചിട്ട് നാലു ദിവസം ആയെങ്കിലും ഇന്നാണ് ഉച്ച ഭക്ഷണം വിളമ്പാൻ ഉള്ള ജോലി കിട്ടിയത്. ചോറും പയറും സാമ്പാറും ആയിരുന്നു വിഭവങ്ങൾ.5, 6, 7, 8 എന്നീ ക്ലാസ്സുകളിലെ കുട്ടികൾക്ക് ആണ് സ്കൂളിൽ നിന്നും  ഭക്ഷണം ഉള്ളത്.  

ഇന്ന് സ്കൂളിൽ പരീക്ഷ ആരംഭിച്ച ദിവസം ആയിരുന്നു. രാവിലെ മുതൽ ഉച്ച വരെ രണ്ട് പരീക്ഷ ആയിരുന്നു ഉണ്ടായിരുന്നത്.ഉച്ചയ്ക്ക് ശേഷം വായനാവാരം സമാപിക്കുന്നതുമായി സംബന്ധിച്ച് കുട്ടികൾ സംഘടിപ്പിച്ച എക്സിബിഷൻ ഉണ്ടായിരുന്നു.3 പേർ അടങ്ങുന്ന രണ്ട് ടീം ആയിട്ടാണ് ഞങ്ങൾ മാർക്ക് ഇടാൻ പോയത്.എല്ലാം ഒന്നിനൊന്നു മികച്ചത് ആയിരുന്നു. 

ഇന്നലെ സ്കൂളിലെ രണ്ടാമത്തെ ദിവസം ആയിരുന്നു.ഇവാനിയോസ് പിതാവിനെ അനുസ്മരിക്കുന്നതിന്റെ ഭാഗമായി സ്കൂളിൽ ഉച്ചക്ക് ശേഷം കുട്ടികളുടെ കലാപരിപാടികൾ ഉണ്ടായിരുന്നു.കഥയും കഥാപ്രസംഗവുമായി കുട്ടികൾ സ്റ്റേജ് മുഖരിതമാക്കി.

ബി എഡ് കോഴ്സിന്റെ ഭാഗമായുള്ള രണ്ടാം ഘട്ട ഇന്റേൺഷിപ് ഇന്നലെ ആരംഭിച്ചു.സെൻറ് ഗൊരേറ്റി ഹയർ സെക്കന്ററി സ്കൂൾ ആണ് ലഭിച്ചത്. ചിട്ടയായ സമയക്രമവും പ്രാർഥനാപൂർണ്ണമായ അന്തരീക്ഷവും ഇന്നലത്തെ  ദിവസത്തെ സന്തോഷഭരിതമാക്കി.8 ബി 8 ഡി ക്ലാസ്സുകളെ ആണ് പഠിപ്പിക്കാൻ ലഭിച്ചത്.